[MR STYLO]

تجربتي مع الابتعاث
2007-2012
ــــــــــ
السلام عليكم ورحمة الله وبركاته

اليوم حاب اني اسرد لكم تفاصيل ابتعاثي من الى . .

من اول فتره تقديمي على البرنامج في المرحلة الاولى . وحتى وقت استلام الشهاده والحمد لله .

راح تكون على نقاط . . . على شان يسهل الوصول اليها وسردها بشكل افضل .
واتمنى ان مايكون فيه ردود حتى اخلص لان فيه معلومات كثير راح اسردها بتكون مفيده جدا . للي ناوين يكملون في اليابان . .

النقاط الي راح اتكلم فيها كالتالي :
1-التقديم
2- الملتقى الى اجراءات السفر الى اليابان
3-السكن
4- المعهد
5-الجامعه
6-الجوال
7-التامين
8-الرخصه
9-البلدية ودار الهجرة مالك وماعليك
10-التنقل
11-مابعد التخرج ؟
12-نصائح عامه .
=====================================

# - بالبداية البطاقة الشخصية
الاسم - محمد الشمري
التخصص - هندسة الكترونيات متقدمه
الجامعه - جامعه تيكيو للعلوم والتقنية
التخرج - 2012
العمل - حاليا اعمل بشركه يابانية بالمملكة .

-------------------------------------------
つづく

[MR STYLO]

عام 2007

1-التقديم
2- الملتقى الى اجراءات السفر الى اليابان
ـــــــ

بالبداية بعد التقديم على الموقع . وبعد القبول المبدئي عشنا اسوء لحضات العمر
كوننا المرحلة الاولى للبرنامج . فكان التنسيق بطيئ جدا . . .

طبعا تقديمي ولله الحمد كان باخر يوم للتقديم . ولاكنت اعرف انه اخر يوم بس ربك الحمد لله .

بعد القبول المبدئي انتظارنا دام 7 شهور. الي طلع من جامعه حائل زي حالتي وتوهق .
من قو الانتظار رحت سجلت بجامعه الجوف هههههههههههههه خفت ان تم السحب علينا

بعدها ماكان فيه مرحلة تدقيق المستندات .
كان فيه مقابلة شخصيه .
مقابله شخصيه
اجريتها في فندق الفهد كراون ( مدريام كروان حاليا ) في الرياض . كانت كاي مقابله عاديه . وفيها يتم تسليم المستندات.
بعدها حددو لنا مواعيد الملتقيات
الملتقيات
كانت على مدى 3 ايام . كان فيها في اليوم الاول . انظمه الابتعاث وكيفيه تمثيل البلد
وبعدها جانا الشيخ المطلق وتكلم عن الناحيه الفقهيه والشرعيه والمحظورات وغيرها

بعدها جابو لنا احد الخبرات في اليابان وهو المهندس البهكلي .وشرح لنا تجربته عن اليابان .
وطلعنا من الملتقى بشنطه هديه فيها مصحف وحاسبه

الضمان المالي والوزاره والسفر
بعدها توجهنا الى الوزاره لاخذ الضمان المالي وبعدها للسفاره لاستخراج الفيزا .
وفي السفاره حددو لنا المعهد الي بدرس فيه والمنطقه . .
وبعدها بفتره استدعونا الى الوزاره واستلمنا التذاكر .وجاء وقت السفر الى اليابان والى اوساكا بالتحديد

====================================
つづく

[MR STYLO]

3- السكن
ـــــ
السكن باليابان بشكل عام يختلف من منطقه الى منطقه اخرى ومن محطه لمحطه .
بحسب القرب والبعد من محطات القطار كل ماكنت اقرب كل ماصار السعر اعلى
وكل ماكنت اعلى بالادوار كل مارتفع السعر. <<عكس السعودية يبي الارضي اقرب

طبعا اول ماوصلنا اليابان استلمنا سكن في عماره 11 دور كان فيها 80 طالب سعودي وطالبه .
السكن كان عباره عن غرفه واحده ودوره مياه ومروش( الله يعزكم) . ومطبخ تحضير بالممر .

هذه شقتي اول سنه وثاني سنه باليابان نفس نظامها بس بطوكيو .

اخر 3 سنوات . سكنت بشقه كبيره عباره عن 3 غرف وصاله ومطبخ .
يعني تبحبحت hapb040

هذا بالنسبه لي
-------------------
بشكل عام . الملحقيه اذا كنت طالب اعزب سقف السكن لك بالشهر 70 الف ين كحد اعلى . يعني مايقارب 2500 ريال شهريا حاليا حسب سعر الين .
واذا كنت متزوج سقف السكن لك بالشهر 100 الف ين كحد اعلى مايقارب 4000 ريال شهريا .
طبعا مازاد على ذلك يتحمله الطالب انا شقتي كانت بـ 120 الف ين شهريا
كنت ادفع زياده 800 -900 ريال تقريبا .
--------------------------
كيف تستاجر سكن .
طبعا السكن عشان تستاجره لازم يكون لك كفيل بالدوله والكفيل الي هو الجامعه
الجامعه مسؤوله بشكل كامل عنك وعن امورك كلها . مضبطتك
طبعا على شان تسكن . احسب حساب التالي :

1- اسال عن بعد السكن عن المحطه
2- اسال عن الخدمات القريبه
3- اسال عن الشقه فيها انترنت او لا ؟
4- اسال عن الماء هل مشمول ضمن الايجار او لا .؟
5- اسال عن السخان المياه هل هو كهرباء او غاز ( لان الغاز فواتير )
6- اسال هل السكن يلزمه تامين قبل السكن او لا ؟

لان على شان تستاجر اغلب العمارات او اصحاب العقار
يشترط دفع مقدم كم شهر. + اايجار شهرين كتامين +
ايجار شهر هديه لصاحب السكن<<نظام غصب تعطيني هديه

طبعا كلها بظهر الملحقيه الا في حاله انك جلست فتره وحبيت تغير سكنك تتحمل التكاليف.
---------------------
النقل :

نقل الاثاث طبعا يكون عن طريق شركات النقل. تكلم الجامعه او المعهد ويرتب لك اياه
تدفعه انت وترسل الفواتير للملحقيه تعوضك . اذا كان النقل بسبب الانتقال لجامعه بمنطقه اخرى لسكن جديد ماتتحمل الملحقيه اي تغيير لاحق .


====================================
つづく

[MR STYLO]

4- المعهد
5-الجامعه
ــــــــ

المعهد

في اليابان المعاهد المعترفه فقط معهدين
Japan Student Services Organization -JASSO
sendagaya japanese institute

جاسو له فرعين ( اوساكا - طوكيو )
سانداغايا ( طوكيو )
طبعا جاسو حسب تجربتي ممتاز جدا واحترافي وشهرته عاليه . بمعاهد اللغه .
انا درست بجاسو اوساكا .

التسجيل في المعاهد يكون عن طريق الملحقيه مالك اي دخل فيه يجيك القبول وانت مرتاح ماتحتاج اي شي تسوينه على شان تسوي القبولات ولا اي حاجه ارقد وامن <<

وهو يضبط امورك بالبدايه من ناحيه جوال وتسجيل وتامين وتضبيط الفيزا والامور هذه وعاده يكون فيها يابانيات يتكلمون عربي >ياحبيباتي يايويي وهامادا يتكلمن مصري

الجامعة

بعد ما اكملت السنه الاولى في المعهد رفضت المواصله لسنه اخرى وكان مسموح لنا من الملحقيه بس انا مستعجل مدري وش وراي كان

المهم اني لقيت لي جامعه بطوكيو وكلمت المعهد ورتبو لنا زياره لها انا ومعاي 10 فقط .
رحنا وشفنا الجامعه وطلبنا منهم اننا نسجل وافقو على طول. وحددو مواعيد للمقابله الشخصيه
ورحنا وقت المقابله .
طبعا لازم الزي الرسمي السوت التوكسيدو والحركات بالمقابله ( اول مره واخر مره لبسته بعدها بثوب وشماغ اجي <<سعودي متحجر

عدينا المقابله البسيطه جدا كانت بس سوالف.
اخترنا التخصص وكل شي وبدات المواد الالزاميه والاختياريه وتضبيط الجداول
وبدانا الدراسه طبعا في موضوعي الثاني انا شارح فيه عن الجامعه والانظمه . مابي اطول عليكم فيها هنا .

الي بشرحه لكم هنا .هو دور الجامعه
دور الجامعه بحياتك العامه خارج الجامعه هوالضامن والكفيل. (بس مافي وقت تصحيح اوضاع ) امورك مصححه

يعني لو لاقدر الله صارت لك اي مشكله في الجامعه او خارج الجامعه او اي مكان الجامعه اول مايتم تبليغها وهي بدورها تبلغ الملحقيه الثقافيه ويجيبون فيك العيد هههههههههههه

يعني باختصار الجامعه هي كل شي لك هنا
حتى ايجار السكن تدفعه الجامعه + تكفلك
طبعا هذا اذا كانت الجامعه متعاونه مع الملحقيه وهذا تقريبا 85 % من الجامعات المعترفه .


====================================
つづく

[MR STYLO]

6-الجوال
ـــــــــ
جينا لاهم جزء الي انا جايب العيد فيه فواتير ومصايب هههههههههههههه

في اليابان فيه 4 شركات كبرى للجوالات والانترنت .
1- Soft Bank
2- NTT DOCOMO
3- au
4- welcome
طبعا انا جربت الشركات الثلاث الاولى . وبشرحها لكم حسب خبرتي.

بالبدايه :
في اليابان عموما الاتصال وسيله غير محببه عند 99% من الشعب الياباني .
يعتبرونها في الحالات الطارئه اتصل فيني .
طريقه التواصل تكون عن طريق الايميل والمراسله . فقط .

كل شركه تروح لها يكون عندهم نظام باقات تحصل على انترنت واتصال كم دقيقه مجانيه مع ايميل .مع مع مع مع مميزات عديده .

طبعا نظام اليابان مافي محلات جوالات . تشتري جوال وتشغله لا.
تروح للشركه وتاخذ الجوال من عندهم اما كاش او اقساط على الفاتوره .
وتطلع جوال وشريحه من عندهم . ومافي جوال يشتغل على شركه ثانيه

1- SOFT BANK
الشركه هذه انا اكرهها كره لاني لدغت منها وعلي فاتوره وصلت الى 16 الف ريال سعودي ههههههههههههههههههه

طبعا الواحد مايكون عارف ايش قدامه ( لقيت نفسي طايح بباقه رجال الاعمال وانترنت وايميل ولا اعرف استخدمه وتلفزيون لاني ماخذ جوال غالي جدا ههههههههههههههه ) مقرود

الاتصال الخارجي غالي جدا باليابان وبتجيك فاتوره تكسر ظهرك .
الاسلم كنا نتصل عن طريق الاسكايب SKYPE اشحن بـ 2000 ين حوالي 80 رياال وكلم السعوديه 45 دقيقه .

2- NTT DOCOMO
هذه شركه متميزه وهي الرائده باليابان لانها شركه كبيره وتغطي الانترنت مع الجوال والموادم وغيرها شركه ممتازه واجهزتها حلوه .
واذا لقيت لك باقه كويسه بتستمر معاهم .

3- au
هذه ارخص شركه باليابان والاغلبيه ياخذ منها صح اجهزتهم ابو كلب بس الرخيص حلو ههههههههههههههههه اانا رجعت لهها بعد ما انلسعت من الشركات الي فاتت

طبعا فيه عندك نظام prepaid card هذا افضل نظام اشوفه انا
مميزاته تفتك من الفواتير لانه شحن زي سوا .
وعيبه ان مافيه لانت ولا ايميل . بس اتصال .
بصراحه انا فادني مؤخرا

لاني طلعت من DOCOMO واير لس نقال بمبلغ ثابت 150 ريال شهريا
ريحت مخي ههههههههههههههههههههه



====================================
つづく

[MR STYLO]

7-التامين
8-الرخصه
ـــــــــــ

التامين
التامين الطبي في اليابان . على حساب الملحقيه الثقافيه
وبصراحه التامين الطبي مهم جدا جدا جدا لان اليابان غاليه نار بخصوص المستشفيات
يعني انتبه مايكون معك تامين حتى هم يرحمونك

التامين الطبي يكون عن طريق البلديه او مايعرف بمجلس المدينه او City Hall
تروح لهم وتطلع التامين الطبي

ويكون التجديد سنوي من عندهم ايضا وعليه فواتير .ومتساهلين جدا
انا ماسددت منه ولاريال .من دخولي اليابان لخروجي منها .

طبعا مره رحت لهم وقلت انا بعرف كم علي قال لي عليك مبلغ جامد بس ناسيه بس كان فوق ضربه هههههههههههههههه
المهم قلت لهم انا طالب وكذا والمبلغ غالي
قالو لي كم يناسب المهم نزلت السعر الى 80 % من القيمه خصم .
لو شديت عليهم كان سامحوني هههههههههههههه لا واقساط بعد

================================

الرخصه

جينا على الجرح
طبعا بالنسبة للقياده باليابان عندهم انظمه كثير ومعقده كثير. والسواقه عندهم عكس الدركسون يمين .

التقديم يكون بمركز الرخص التابع لمنطقتك .مالك حق تروح مركز ثاني الا الي انت ساكن فيه . وهذا موجود ببطاقه الهويه معاك عنوانك . مكتوب فيها. ( هذه فيها لعبه بقولها لكم اخر الشرح ) اوريكم السعودي سعودي hap:

طبعا الرخصه السعوديه والرخصه الدوليه غير مسموح فيها باليابان ابدا ابدا .

لاكن لو معاك رخصه سعوديه الشكل القديم
امورك بالسليم فقط ترجمها من السفاره وقدم اوراقك

معاك الرخصه السعوديه الشكل الجديد
ترجمها وجيب برنت من المرور مبين فيه تاريخ الاصدار مختم من السفاره
طبعا هم يترجمونها لك ويختمونها.

طبعا بعد التقديم بتخضع لاختبار تحريري او عن طريق الكمبيوتر وفيه بالعربي .
تجاوب على الاسئلة واذا حليت 7 من اصل 10 تنجح .

بعدها تنتقل لاختبار النظر والالوان ولازم تعديه .

بعدها تنتقل لاختبار القياده وهذا هو المشكله بالنسبة لي جبت العيد كم مره .

طبعا الاختبارات الي فاتت الي تعديها خلاص ماترجع لها مره اخرى .
مثلا عديت التحريري والنظر وسقطت بتجربه القياده

ترجع مره اخرى للتجربه فقط مع مبلغ 100 ريال تقريبا عن كل عمليه اعاده للاختبار

طبعا فيه مدارس لتعليم القياده انا اشوف انها افضل
تدفع تقريبا مبلغ 5000 ريال وتدرس عندهم شهرين
بعدها على طول تاخذ الرخصه بدون اختبار ولا هم .

هذه اذا رجعت ان شاء الله بجربها هههههههههههههههههههههه

بخصوص التقديم الي قلت لكم النصبه الي سويتها فيهم انا . .
بعد ماياست من المركز الي تبع مدينتي سمعت ان فيه مركز سهل ويمشي يبعد عني بالقطار حوالي 3 ساعات قلت مالي الا هو
رحت لمجلس المدينه الي بختبر فيها وقلت انا جاي لمدينتكم وبسكن هنا عشان تقديمات وبقعد فيها 3 شهور .قالو عطنا عنواان جديد لك . اعطيتهم عنوان صديق لي بالمدينه حقتهم وسجلوه لي وختمها لي .

رحت لمركز الرخص وقبل اوراقي وعدت الاختبارات التحريري والنظر وعديت

وباختبار القياده عدت 3 مرات ولانجحت
كل اسبوع مره وجاء اسبوع اجلوها اسبوعين . جلست حوالي شهر ماقدرت اخذها

بعدها ياست رجعت مدينتي ولاغيرت عنواني اكتشفت ان فيزتي بتنتهي .ولازم اجددها
رحت اجددها عطيتهم بطاقتي قالو لي خيو. انت مو من هنا ارجع مدينتك قدم فيها hap:hap:hap:hap:hap:

رحت للسيتي هول قلت لهم انا بطلت اكمل ماستر برجع بيتي عنواني الاول ورجعوه ورجعت قدمت الفيزا <مشواااااااااااااااااار



====================================
つづく

[MR STYLO]

9-البلدية ودار الهجرة مالك وماعليك
ـــــــــــــــــــــــ

البلدية

البلدية او مايطلق عليها مجلس المدينه او city hall
هذه من اهم الدوائر الحكوميه الي راح تحتاجها خلال جلستك في اليابان

طبعا هي الكل بالكل وكل دائره ترجع لها بجميع اعمالها
اول احتياج لك فيها راح يكون من خلال اصدار بطاقه الاقامه لك . < التصحيح

تاخذ اوراقك من المعهد انك مسجل عندهم ومن هالامور والجواز وتروح لهم مع صور شخصيه الحلو باليابان ان مكينه التصوير زي مكينه الببسي بكل شارع

وتصدر ورقه زرقاء مؤقته لحين تخلص بطاقتك .
البطاقه مكتوب عليها عنوانك وفيزا الدراسه .وطبعا العتوان يتغير على حسب انتقالك في البطاقه من الخلف يكتب يدويا من عندهم ويختم . .

طبعا يكون معاك ختم تروح وتسوي لك ختم وتروح للسيتي هول وتصدر شهاده
بالختم على شان يكون رسمي تقدر تفتح حسابات بنكيه وغيرها .

الشي الاخر الذي تستفيد منه من مركز المدينه او السيتي هول
هو كما ذكرنا التامين الطبي اصداره يكون من خلالهم .

الشي الاخر الي يمكنك اصداره من خلالهم مثلا كان عندك اطفال وتبي حضانه
تروح لهم وتقول انا طالب يعطونك تخفيض لحضاانات الاطفال لان الملحقيه ماتشملها .

الشيئ الاخر والاهم بالنسبة للدارسين على حسابهم الخاص .
ان السيتي هول يعطيك راتب شهري تقريبا 3500 ريال اذا كنت تدرس على حسابك
كمساعده . لك <<اهنيهم . بصراحه .

لا وازيدك من الشعر بيت . . اذا عندك طفل بعد يصرفون له راتب شهري تستلمه كل 6 شهور . تقريبا 1000 ريال بالشهر .بس هم يجمعونها ويعطونك اياها .
حاجه حلوه <<

أيضا تحتاجه بامور نقل الملكيات والمواقف للسيارات وغيرها الكثثير.


طبعا السيتي هول مميزاته كثير وافضل شي من توصللهم تروح وتسال عن كل شي الخدمات الي يعطونك اياهاا . .



دار الهجرة

دار الهجره هذا المسوؤل عن مكوثك في اليابان <متعوب عليها مكوثك

طبعا الفيزا والتجديد واستخراج تاشيرات الدخول والخروج كلها من عندهم .
طبعا امورهم سهالات اذا اوراقك تمام .
يطلبون عليك اوراق الجامعه كامله وصور لك وتعبي الابكليشن لاصدار الفيزا مده دراستك .

طبعا كحد اعلى سنتين قابله للتجديد . اذا الفيزا دراسه مايعطونك اكثر من كذا .

وبصراحه ماعندي معلومات كثير عنهم لان شغلتهم تقتصر على الفيز فقط . ,


====================================
つづく

[MR STYLO]

10-التنقل
ـــــــــ

جينا للجزء الاهم في اليابان والجزء الي يشكل البنيه الاساسييه لليابان .
والجميل فيها انها تحافظ على الوقت بشكل كبيره جدا اذ ان في كل محطه للقطار او للباص تجد لوحه وصول القطارات تعدل بشكل شهري بوصول القطار بالساعه والدقيقه بالضبط . .
والجميل ايضا ان المدن المزدحمه تجد في ساعات الذروه القطارات تكون متتاليه بفارق دقيقه الى دقيقتين انتظار. هذا يدل على حسن التدبير والاهتمام .

والجميل ايضا والي اعتبره احترام وتقدير للعمل والجهد . هو ان محطه القطار اذا تسببت في تاخير الموظف عن عمله . عند وصول القطار يقف طاقم المحطه كلهم معهم اوراق اعتذار تعطى لجميع الركاب لايصالها لمدراءهم ان سبب التاخير كان من قبلنا
احترااااااااااااااااااااااااااااااام

التنقل بكل بساطه في اليابان يعتمد على عده طرق اسايه للتنقل وراح اكتبها لكم حسب الاهميه .

1- القطارات ( ولها عده انواع راح اشرحها بالتفصيل .)
2- الباصات
3- الدراجات الهوائيه
4- السيارات والدراجات الناريه .

-----------------------------------
1- القطارات .
تاتي القطارات في طليعه اهم وسيله تنقل في اليابان لانها تعد الاسرع والارخص من
ناحيه التكلفه والوقت . هي تساعدك بشكل كبير على التنقل بين المناطق والمحطات الاساسيه في المدينه الواحده لان مثلا ناخذ طوكيو تحتوي على عدد كبير من المحطات
الي يمكن نسميها نحن احياء . فالتنقل بين الاحياء او المحطات بالقطار امر سلس ورائع ورخيص التكلفه

انواع القطارات :
1- JR وهذه سكه الحديد الرئيسيه في اليابان وهي المسؤوله عن التنقل بين المحطات والمدن ايضا .
2- subway او مايعرف بقطار الانفاق : هذا مسؤول عن التنقل من تحت الارض
بين محطات المدينه الواحده
3- المونوليل او مايسمى بالقطار المعلق : هذا يعمل عمل قطار الانفاق والجي كسكه حديد مسانده . وهذه تساعد على التنقل بين المحطات في المدينه الواحده .
4- الشنكانسن او مايعرف بقطار الرصاصه : هذا القطار السريع جدا تصل سرعته لحوالي 350 كلم\ساعه .هذا القطار يساعد على التنقل بسرعه فائقه بين المدن والمقاطعات ولايعمل داخل المدن .
-------------------------------------
الباصات
الجدير بالذكر بان باصات النقل العام تعمل عمل القطارات داخل المدينه الواحده
والاجمل ايضا انه طول فتره تواجدي في اليابان لم اجد قطار او باص تاخر عن موعده
القطار ممكن نقول انه على كهرب وكذا
الباص يسير بالطريق العام مع السيارات والاشارات الضوئية . كيف لايتاخر عن موعده ؟
السر يكمن في حركه المرور السلسه في اليابان والتي لاتتوقف ابدا .

الباصات هي الوسيله الثانيه المهمه في اليابان للتنقل من المنزل الى العمل طبعا
يكون بكل شارع لوحه محطه توقف الباص توقف وتشوف وقت وصوله وتركب وتروح .
-------------------------------------
الدراجات الهوائية

طبعا الدراجات الهوائيه امر معروف على مستوى العالم انه وسيله تنقل + رياضه .
اليابان ايضا يهتمون بهذه الوسيله بشكل كبير يعني عادي تلقى عايله الاب والام والاولاد ورا بعض على السياكل . .امر عادي
المميز فيها انك تتقي الزحام . ولاتمر عند شوارع مزحمه وتسير على الارصفه .
فتعتبر وسيله سريعه وامنه ايضا .
------------------------------------
السيارات والدراجات الناريه
طبعا تاتي بالمرتبه الاخيره بسبب غلاء البنزين في اليابان اذ يصل سعر اللتر الى حوالي 6 ريال وهذا سعر مبالغ فيه
انك تعبي سيارتك فل اكثر من 250 ريال الى 400 ريال . كل اسبوع امر صعب.
لذلك ترا الاغلبيه من الاجانب لايتجهون الى السيارات .
بس عاد تعال فهم الشعب السعودي وانا اولهم لاتشترون سيارات


================================
التكاليف بالنسبة للمواصلات .
تاتي القطارات والباصات في طليعه الارخص تكلفه والاسرع للوفت .


بالنسبة للقطارات JR -subway - مونوليل -

لاتتجاوز سعر تذكره القطار للتنقل من خلال المدينه الواحده اذا كان المشوار حوالي الساعه الى ساعه ونص الـ 30 ريال . وهذا سعر رخيص ويمكن يصل لاعلى من هالسعر اذا كان المسافه حوالي 3 ساعات او اكثر. فيه يابانيين يداومون كل يوم من بيته 3 ساعات عادي hap:
طبعا يوجد تخفيض تاخذه من الجامعه وتحصل على بطاقه شهريه مخفظه
من بيتك للجامعه
تبدا اسعارها من 10 ريال والاغلبيه اذا المشوار من 45 دقيقه واقل بـ هذا السعر

الباصات
لايتجاوز سعرها 20 ريال عند ابعد محطه بالمدينه لانه ضمن نطاق المدينه الواحده


الدراجات الهوائيه
اسعارها متفاوته تبدا من 200 ريال الى 5000 ريال سعودي او اكثر

السيارات والدراجات الناريه

كما ذكرت سابقا عائق البنزين يسبب مشكله . لانه غالي .
ولاكن الاسعار ايضا متفاوته وتقريبا نفس اسعار السيارات بالسعوديه
لاكن المستعمل رخيص جدا وفي حاله ممتازه احسن من الوكاله بالسعوديه


====================================
つづく

[MR STYLO]

11-مابعد التخرج ؟
ــــــــــــ

مابعد التخرج , ,

طبعا بعد التخرج باذن الله لجميع الشباب والشابات في اليابان .
يكون عليك بعد استلام شهاداتك

انك تطلبها باللغه الانجليزيه من الجامعه وتطلبها بمعدل على شان الشعب بالسعوديه
لازم معدل ونظام خايس

وبعدين تاخذ الاوراق وتروح لوزاره الخارجيه اليابانيه تصدق على الشهادات

وبعدين ترفع اوراقك للملحقيه . يختمون لك عليها. وتسجل بنظام معادله الشهادات .

وينتهي دورك يتبقى عليك فقط انك ترفع طلب انهاء بعثه من الملحقيه وتحصل على مستحقاتك من الملحقيه تاخذ لك مبلغ كويس يضبط امورك لين تتوظف ان شاء الله

وبعد ماترجع للسعوديه تنتظر منهم رساله يقولون لك تعال استلم المعادله

وعندها تبدا دوره ابحث عن وظيفه

والله يوفق الجميع . .


-------------------------------------------
つづく

[MR STYLO]

12-نصائح عامه
ــــــــــــــــ

راح تكون لاحقا بعد نسمع اراءكم ومقترحاتكم ونفتح باب الردود والتعليقات منكم .
واعذروني على القصور. . ..

واذا فيه اي شيئ نسيت اذكره ياليت تذكروني فيه وانا مستعد اني اجيبه لكم .

بانتظار اراءكم وتعليقاتكم . .


-----------------------------
以上